إزاي بتشتغل التجربة المجانية لمدة 14 يوم؟
كل متجر جديد بيبدأ بتجربة مجانية 14 يوم. اعرف هتلاقي الأيام المتبقية فين، وإيه اللي بيحصل لما التجربة تخلص، وإزاي تكمّل من غير ما متجرك يقف.
في هذا المقال
كل متجر جديد على المتاجر بيبدأ بتجربة مجانية لمدة 14 يوم. في الفترة دي تقدر تجهّز متجرك وتضيف منتجاتك وتستقبل طلبات حقيقية من عملائك من غير ما تدفع أي حاجة. المقال ده بيشرح التجربة بتشتغل إزاي، وتعرف فاضل كام يوم منين، وإيه اللي بيحصل في آخرها.
التجربة بتبدأ إمتى وعلى أنهي باقة؟
التجربة بتبدأ أول ما تفتح حسابك. في الحالة العادية بتكون على الباقة المجانية لمدة 14 يوم. ولو جيت من صفحة الأسعار واخترت باقة مدفوعة قبل التسجيل، التجربة بتكون على الباقة دي لنفس المدة.
مهم: الباقة المجانية مش مجانية للأبد. بعد الـ 14 يوم المتجر بيتقفل لحد ما تشترك في باقة مدفوعة.
أعرف فاضل كام يوم منين؟
- «الرئيسية»: حالة متجرك بتظهر «تجربة مجانية»، وكارت الباقة مكتوب فيه «تجربة مجانية · تنتهي» مع التاريخ وعدد الأيام الباقية.
- الشريط اللي فوق لوحة التحكم: هيظهر لك «أنت في التجربة المجانية» ومعاه عدد الأيام المتبقية وزرار «اختر خطتك». لما الوقت يقرب يخلص، الرسالة بتتغير لـ«فترة التجربة على وشك الانتهاء» وبعدين «التجربة تنتهي قريباً».
- صفحة «اشتراكي»: من القائمة الجانبية تحت «المدفوعات والفوترة». هتلاقي باقتك الحالية وحالتها «تجريبي»، ودايرة بتوضّح الأيام المتبقية وتاريخ الانتهاء.
- الإيميل: هيوصلك تذكير على بريد تسجيل الدخول قبل نهاية التجربة بـ 7 أيام و3 أيام ويوم واحد.
أقدر أعمل إيه في التجربة؟
متجرك بيكون شغّال لعملائك طول فترة التجربة: تقدر تضيف منتجات وأقسام، تظبط شكل المتجر، وتستقبل طلبات. وتجربة باقة «البداية» فيها كل أدوات البيع: السلات المتروكة، والمدونة، والعروض الذكية، وإشعارات المبيعات، وعدّاد المشاهدات، والعدّاد التنازلي وشريط تقدّم السلة، وتقارير البكسل والشحن، و«SEO المتقدم»، وفريق لحد ١٠ أعضاء — عشان تجرّب المنصة كاملة قبل ما تختار. بعد ما تشترك، باقتك هي اللي بتحدد المميزات.
إزاي أكمّل بعد التجربة؟
- افتح «اشتراكي» أو اضغط «اختر خطتك» من الشريط اللي فوق.
- اختار «شهري» أو «سنوي» من أعلى كروت الباقات.
- اضغط «الترقية إلى …» على الباقة اللي تناسبك.
- كمّل الدفع من صفحة «إتمام الاشتراك». التفاصيل في مقال إزاي أشترك في باقة أو أجدد اشتراكي؟
لو اشتركت ودفعتك اتأكدت قبل ما التجربة تخلص، متجرك هيكمّل من غير أي توقف.
لو التجربة خلصت من غير ما أشترك؟
التجربة ملهاش فترة سماح. أول ما تخلص، لوحة التحكم بتتحوّل لصفحة «انتهت الفترة التجريبية» والقائمة الجانبية بتقل لـ«حالة الاشتراك» و«تجديد الاشتراك» و«الملف الشخصي» بس، وعملاءك بيشوفوا صفحة «المتجر غير متاح مؤقتاً» ومش بيقدروا يطلبوا. بياناتك ومنتجاتك وطلباتك كلها بتفضل محفوظة، وبترجع فورًا أول ما اشتراكك يتفعّل. اقرأ إيه اللي بيحصل لما التجربة أو الاشتراك يخلص؟
نصيحة: لو هتدفع بالتحويل عن طريق انستاباي، ادفع قبل نهاية التجربة بيوم أو اتنين، لأن مراجعة الإيصال ممكن تاخد لحد يوم عمل.
هل المقال ساعدك؟