إزاي أضيف منتجات كتير مرة واحدة من الصور؟ (استوديو إضافة المنتجات)
ارفع صور 30 أو 50 قطعة مرة واحدة، والاستوديو يجمّع صور كل قطعة لوحده، تكتب السعر والقسم مرة للكل وتنشر كله بضغطة.
لو عندك قطع كتير كل واحدة مختلفة (زي ملابس preloved أو قطع يدوية)، «استوديو إضافة المنتجات» بيخلّيك تضيف 30 أو 50 قطعة مرة واحدة من صورها بدل ما تضيف كل منتج لوحده.
فين ألاقيه؟
من «المنتجات» دوس «إضافة بالجملة» جنب «منتج جديد». الشاشة شغّالة من الموبايل والكمبيوتر.
الخطوة 1: الصور
- اسحب الصور للمربع أو دوس عليه واختار من المعرض أو الكاميرا (JPG وPNG وWEBP وHEIC).
- الصور بتترفع وشريط التقدّم بيبيّن كام اترفع، والصورة اللي تفشل تقدر تعيد رفعها بـ«أعد المحاولة».
- اختار طريقة «التجميع الذكي»:
- حسب وقت التصوير: الصور اللي اتصوّرت ورا بعض في نص دقيقة بتبقى قطعة واحدة. الصورة اللي مفيهاش وقت تصوير (زي صور الواتساب) بتبقى قطعة لوحدها.
- كل صورة = منتج: لو كل قطعة ليها صورة واحدة.
- حسب اسم الملف: dress-1 وdress-2 بيبقوا قطعة واحدة.
لو التجميع طلع غلط، صلّحه: ادمج قطع مع بعض، أو افصل صورة لقطعة لوحدها، أو اسحب صورة من قطعة لقطعة (من الكمبيوتر)، أو دوس «أعد تجميع الكل».
الخطوة 2: التفاصيل
فوق القطع فيه «قيم موحّدة»: القسم والسعر والسعر قبل الخصم والحالة (جديد بالتاج، زي الجديد، مستعمل استعمال خفيف، مستعمل) والكمية. أي قطعة سايبة الخانة فاضية بتاخد القيمة الموحّدة، وأي قطعة تكتب فيها قيمة بتاخد قيمتها هي.
- لكل قطعة اكتب الاسم والمقاس (المقاس بيتضاف للاسم: «فستان كتان — مقاس 4 سنين»).
- دوس على أي صورة عشان تبقى الصورة الرئيسية.
- من الكمبيوتر استخدم «جدول سريع»: تتنقّل بين الخانات بـ Tab، وتقدر تلزق عمود أسامي أو أسعار من Excel في أول خانة فيتوزّع على القطع.
- حدّد كذا قطعة عشان تدمجهم، أو تحط لهم سعر أو مقاس أو قسم، أو تشيلهم.
كل قطعة عليها حالتها: «جاهز»، أو اللي ناقصها (الاسم أو السعر أو القسم)، أو «فيه منتج بنفس الاسم» لو عندك منتج بنفس الاسم.
الخطوة 3: المراجعة والنشر
- تحت هتلاقي عدد الجاهز والناقص، و«وديني لهم» بتوديك للناقص.
- اختار «انشرهم ظاهرين» أو «احفظهم مخفيين أراجعهم».
- دوس «انشر». القطع الجاهزة بس هي اللي بتتنشر (لحد 100 في المرة)، والباقي بيفضل مكانه تكمّله.
نصيحة: الكمية بتبدأ 1 والمخزون متفعّل، فأول ما القطعة تتباع بتبان «نفدت» لوحدها، ولو الطلب اتلغى بترجع.
ملاحظة: شغلك بيتحفظ تلقائيًا في المتصفح، فلو قفلت الصفحة ورجعت تكمّل من مكانك. والحالة بتتكتب في أول سطر من وصف المنتج.
اقرأ كمان
هل المقال ساعدك؟