إزاي أرفع صور المنتج وأختار الصورة الرئيسية؟
الصيغ والأحجام المسموحة لصور المنتج، إزاي تختار الصورة الرئيسية وترتّب الصور، وإزاي تضيف فيديو من YouTube أو Vimeo.
الصور أهم حاجة بتبيع المنتج أونلاين. في كارت «صور المنتج» تقدر ترفع لحد 10 صور لكل منتج، وأول صورة بتبقى الصورة الرئيسية اللي بتظهر في كارت المنتج في المتجر ولما حد يشارك الرابط.
شروط الصور
| الشرط | القيمة |
|---|---|
| الصيغ | JPG أو PNG أو WEBP |
| أقصى حجم للصورة | 2MB |
| عدد الصور | لحد 10 صور للمنتج |
| المقاس المثالي | 1000×1000 (مربعة) |
| أقصى أبعاد | 4000 بكسل للضلع الأطول |
المنصة بتحوّل الصور تلقائي لصيغة خفيفة وبتصغّرها لحد 1280 بكسل للضلع الأطول، فمفيش داعي ترفع صور أكبر من كده. الصور المتحركة (GIF متحرك) مش مقبولة.
رفع الصور
- في صفحة المنتج، اضغط «أضف أو اسحب صور هنا» أو اسحب الصور من جهازك وحطها في المربع.
- كل صورة بتترفع لوحدها على طول وتظهر رسالة «تم رفع الصورة». العداد جنب العنوان بيوضح عدد الصور من 10.
- عشان تشيل صورة، اضغط علامة × عليها («تم حذف الصورة»).
الصور بتتحفظ أول ما تترفع، فحتى لو الصفحة اتقفلت هتلاقيها لما ترجع.
الصورة الرئيسية وترتيب الصور
أول صورة عليها علامة «رئيسية». عشان تغيّرها، اضغط النجمة «اجعلها الصورة الرئيسية» على الصورة اللي عايزها، أو اسحب الصور وغيّر ترتيبها، وبعدين اضغط «حفظ التغييرات».
ملاحظة: ترتيب الصور بيتحفظ في صفحة التعديل بس. في منتج جديد، أول صورة رفعتها هي اللي بتبقى الرئيسية حتى لو غيّرت الترتيب قبل النشر. لو عايز صورة تانية، انشر المنتج، وبعدين افتحه للتعديل وغيّر الترتيب واضغط «حفظ التغييرات».
لو حذفت كل صور المنتج، المتجر هيعرض صورة افتراضية مكانها.
رسائل الخطأ ومعناها
| الرسالة | المعنى والحل |
|---|---|
| «صيغة غير مدعومة — استخدم JPG أو PNG أو WEBP» | الملف مش صورة بالصيغ دي. احفظه من جديد كـ JPG أو PNG. |
| «حجم الصورة أكبر من 2MB — قلّل الحجم وحاول تاني» | صغّر الصورة أو اضغطها بأي برنامج أو موقع ضغط صور. |
| «وصلت للحد الأقصى» / «الباقي تخطى الحد» | المنتج عنده 10 صور. احذف صورة قبل ما تضيف غيرها. |
| «يرجى تحديد نوع ملف الصورة jpg،jpeg،png» | الرسالة دي بتظهر لأي رفض للصورة، مش بس الصيغة: ممكن تكون أبعادها أكبر من 4000 بكسل، أو الملف تالف. صغّر الأبعاد واحفظها من جديد كـ JPG. |
| «فشل الرفع — اضغط للإعادة» | غالباً مشكلة اتصال. اضغط على الصورة لإعادة المحاولة. |
فيديو المنتج
في كارت «فيديو المنتج» حط رابط فيديو في «رابط الفيديو». الروابط المدعومة من YouTube (بما فيها Shorts) وVimeo بس، وهيظهر الفيديو في صفحة المنتج تحت عنوان «فيديو المنتج». مفيش رفع فيديو من جهازك — ارفعه على YouTube الأول وخد الرابط. وكل منتج له فيديو واحد.
هل المقال ساعدك؟