أرقام لوحة التحكم «الرئيسية» معناها إيه؟

أول ما تدخل لوحة التحكم بتفتح على «الرئيسية». الصفحة دي بتديك صورة سريعة عن متجرك. هنا هنشرح كل جزء بيحسب إيه بالظبط، عشان تقرأ الأرقام صح.

الجزء العلوي

• حالة المتجر: شارة زي «نشط» أو «تجربة مجانية» أو «فترة السماح» أو «منتهي».
• كارت الباقة: اسم باقتك وتاريخ انتهائها وعدد الأيام الباقية. الضغط عليه بيفتح صفحة الاشتراك.
• «صحة المتجر»: درجة من 100 بتقيس اكتمال إعداد متجرك، مش مبيعاتك. بتزيد لما تكمّل خطوات زي: الشعار، المنتجات، طريقة الدفع، الشحن، السياسات، المظهر، الدومين المخصص، التتبع، وأول طلب. من 80 وفوق بتبقى «ممتاز»، من 50 «جيد»، وأقل من كده «يحتاج إعداد». بعض الخطوات اختيارية (زي الدومين المخصص)، فمش لازم توصل 100. كارت التفاصيل تحت مكتوب فيه «قريبًا».

التنبيهات

بتظهر بس لما يكون فيه حاجة محتاجة منك:

• «طلب جديد بانتظار المراجعة»: عدد كل الطلبات اللي لسه في حالة الانتظار، مهما كان تاريخها (مش طلبات النهارده بس). الضغط بيفتح «الطلبات».
• «منتج بمخزون منخفض»: المنتجات اللي مفعّل لها تتبع المخزون وكميتها 5 أو أقل، ومنها اللي خلصت خالص. شوف إزاي أعرف المنتجات اللي مخزونها قرب يخلص؟

الرسوم البيانية

• «تطور الإيرادات»: إجمالي الطلبات لكل شهر في السنة اللي تختارها من القائمة جنب العنوان. بيحسب كل الطلبات ما عدا الملغية، سواء اتدفعت أو لسه — يعني طلب الدفع عند الاستلام بيدخل من أول ما يتعمل.
• «الطلبات حسب الحالة»: كل طلباتك من أول ما فتحت المتجر، متقسمة على الحالات: «قيد المراجعة»، «جارٍ التحضير»، «تم الشحن»، «تم التسليم»، «ملغي / مسترجع»، و«مُرتجع». الطلبات اللي اتسلّمت للعميل بتتحسب تحت «تم التسليم».

القوائم

• «آخر الطلبات»: آخر 6 طلبات، مع حالة الدفع («مدفوع» أو «غير مدفوع») ومصدر الطلب زي «الموقع» أو «التطبيق».
• «الأكثر مبيعاً»: أعلى 5 منتجات بعدد القطع في الطلبات غير الملغية. الرقم اللي جنب «مباع» بيعد القطع في الطلبات المدفوعة والمسلَّمة بس، فممكن تلاقي منتج في المركز الأول والرقم جنبه صغير أو صفر. القائمة دي بتتحدث كل ربع ساعة تقريباً.
• «أفضل العملاء»: أعلى 5 عملاء بإجمالي مشترياتهم في الطلبات غير الملغية، ومعاهم اللي طلبوا من غير حساب. لو العميل دفع جزء بس، بيظهر المبلغ «محصّل».

الطلب بيبقى «مدفوع» إمتى؟

طلب الدفع عند الاستلام بيتسجل «مدفوع» لما تنقله لحالة الشحن أو التسليم. عشان كده حدّث حالات طلباتك أول بأول، وإلا هتلاقي أرقام التحصيل أقل من الحقيقة.