إزاي أعمل أقسام (فئات) لمنتجاتي وأديرها؟
الأقسام بتنظّم منتجاتك في المتجر وفي البحث. اعرف إزاي تضيف قسم بصورته، تعدّله، توقفه أو تحذفه — وإيه اللي بيحصل لمنتجاته.
الأقسام (الفئات) هي اللي بتقسّم منتجاتك في المتجر: ملابس، إكسسوارات، أحذية... كل منتج لازم يكون في قسم قبل ما تنشره، والعملاء بيتصفحوا الأقسام وبيدوّروا بيها.
إضافة قسم جديد
- من القائمة الجانبية افتح «التصنيفات». هتفتح صفحة «فئات المنتجات».
- اضغط «إضافة فئة».
- اكتب «اسم الفئة». لو اللغة الإنجليزية متفعّلة في متجرك، هتلاقي خانة تانية للاسم بالإنجليزي.
- لو حابب، ارفع «صورة الفئة» (اختياري): JPG أو PNG أو WEBP لحد 4 MB.
- اضغط «حفظ». القسم بيتعمل وحالته «نشط» على طول.
نصيحة: خلي صورة القسم بسيطة وواضحة، وأبعادها أقل من 4000 بكسل. المنصة بتصغّرها تلقائي لحد 800 بكسل.
تعديل قسم
اضغط أيقونة «تعديل» في صف القسم، غيّر الاسم أو استبدل الصورة، واضغط «حفظ». تقدر تستبدل الصورة بصورة تانية، لكن مفيش حالياً طريقة تشيل الصورة خالص.
إيقاف قسم وتشغيله
اضغط على حالة القسم في الجدول: «نشط» يبقى «موقوف»، والعكس. الضغطة بتنفّذ على طول من غير سؤال تأكيد.
تحذير قبل ما توقف قسم: إيقاف القسم بيشيله من كل المنتجات اللي فيه، ولو رجعت شغّلته تاني المنتجات مش هترجع له لوحدها — هتحتاج تفتح كل منتج وتختار له القسم من جديد. كمان المنتجات اللي ملهاش قسم مش بتظهر في صفحات الأقسام ولا في نتائج البحث في متجرك (بس بتفضل ظاهرة في الصفحة الرئيسية). ولو فيه بانر بيودّي على القسم، البانر بيفضل بس من غير رابط.
لو عايز تخفي منتجات قسم معيّن مؤقتاً، الأفضل تخفي المنتجات نفسها من «المنتجات» بدل ما توقف القسم.
حذف قسم
اضغط أيقونة «حذف» في صف القسم. لو القسم فيه منتجات هتظهر رسالة «حذف الفئة؟» بتقول «الحذف لن يحذف المنتجات، لكنها ستُصبح بدون فئة.». أكّد بـ«احذف». بعد الحذف راجع المنتجات دي واختار لها قسم جديد عشان ترجع تظهر في الأقسام والبحث.
متابعة الأقسام
- الأرقام فوق بتوضح «إجمالي الفئات» و«فئات نشطة» و«فئات بها منتجات» و«فئات فارغة».
- عمود «المنتجات» بيوضح عدد المنتجات في كل قسم.
- خانة «ابحث عن فئة…» بتوصلك لأي قسم بسرعة.
حدود حالية
- كل منتج في قسم واحد بس.
- مفيش أقسام فرعية (قسم جوه قسم).
- مفيش ترتيب يدوي لظهور الأقسام في المتجر.
هل المقال ساعدك؟